اسناننا دايما بنشتكى منها والسبب ...

عمرك سألت نفسك انت بتغسل أسنانك صح ولا غلط ؟
بتستغرب ليه عندك تسوس مع انك محافظ دايما على غسيل اسنانك ؟

دة عادي جدا على فكرة، متستغربش .. انت ممكن تكون فعلا بتضر أسنانك لما بتغسلها غلط ودة بيحصل لما بتستخدم فرشاة مش مناسبة لأسنانك وليكن فرشاة خشنة مثلا .. اللى بتعمل تآكل فى طبقة المينا وبالتالى هتخلى اسنانك حساسة،
طبقة المينا دي بتكون لونها ابيض فا لما بيحصل تآكل ليها بتبان طبقة العاج اللى تحتها وبالتالي أسنانك بتتحول من اللون الابيض للون الأصفر :(

طيب .. امتى أسنانك تسوس حتى وانت مهتم بيها وبتغسلها ؟!
دة بيحصل لما بتغسل أسنانك مرة واحدة بس في اليوم أول ما تصحى وتبقى فاكر نفسك كدة خلاص بقيت فى الأمان .. بس انت مش واخد بالك انك طول اليوم بتاكل وتشرب سكريات.. قهوة شاي نسكافيه حاجة ساقعة ، بالتالى بقايا الاكل على أسنانك بتبقى فترة طويلة وبالتالى البكتريا بتزيد فى بؤك وتبدأ تشتغل على التسوس وانت مش حاسس .. دة غير كمان اللى بيغسل أسنانه طول اليوم بس قبل ما بينام بيكسل دة بقا اكتر حد معرض للتسوس لان وقت النوم وقت نشاط البكتريا اللى بتشتغل على الحاجات اللى مازالت لسه فؤ بؤقك من أثار عدوانك الثلاثي طول اليوم على الاكل والشرب ودة بالنسبة للبكتريا بيبقى عبارة عن مستنقع جميل تعيش فيه طول الليل وتبقى آخر حلاوة :D

علشان كدة خلى بالك من الكام نقطة اللى هقولك عليهم دول ..
- استخدم فرشاة أسنان مناسبة لأسنانك ( متوسطة او ناعمة ).
- كمية المعجون اللى بتستخدمه تكون معقولة ( مش بكترته ).
- الفرشاة بتاعتك لازم تتغير كل 3 شهور ع الاكتر.
- لازم تغسل أسنانك كل يوم قبل ما تنام .
- بعد كل وجبة بنص ساعة لازم تغسل اسنانك والمضمضة بشكل كويس فى حالة انك هتشرب حاجة فيها سكريات عالية او ممكن تاكل لبان خالى من السكر .
- متزودش عدد مرات غسيل اسنانك فى اليوم عن 3 مرات .
- مدة غسيل الاسنان بتكون دقيقة او اتنين .. مش هما 15 ثانية وتزهق :D
- اوعى تهمل استخدام الخيط الطبي يوميا.
- اهتم دايما انك تعمل كشف دورى على أسنانك ع الاقل كل 6 شهور علشان تبقى مطمن دايما على اسنانك ولو فيه مشكلة عندك تلحقها فى الأول 



منقوووول

معلومات عالماشى مهمة للاطفال بالصور (ادوية وطعام )

الاخطاء الشائعة عند ادخال الطعام

1- إدخال الأطعمة أو الأغذية المساعدة مع حليبها قبل بلوغ الطفل 4 أو 6 شهور، حسب المدرسة التي تتبعينها مع طبيبك في إطعام صغيرك، ولا يجب الاعتقاد أن حليبك لن يكفيه إلا لو أخبرك الطبيب بمشكلة في وزنه أو صحته. التسرع في إطعام الصغير الطعام الصلب قد يتسبب في إصابة الطفل بالسكر أو الحساسية فيما بعد، وفقًا لما أثبتته العديد من الأبحاث والدراسات العلمية، كما أنه يُشعر الطفل بالشبع ويحول دون حصوله على ما يكفيه من الرضاعة الطبيعية اللازمة لنموه.

2- إعطاء الطفل أعشاب اليانسون لعلاج المغص في أول أربع شهور، لأنها تؤذي كبد الطفل الرضيع.

3- عدم التدرج في إطعام الطفل وكمية الطعام ووضع جدول إطعام صارم وإجبار الطفل عليه، حيث يجب أن تبدأ في تقديم وجبات سهلة مسلوقة ومهروسة وبكميات صغيرة أولًا وتتدرج في الكمية حسب قدرة الطفل، وتستبعد الطعام غير المناسب له إذا وجدته غير مهضوم في برازه.

4- تقديم اللبن البقري للطفل قبل بلوغه العام، وهو ما لا يستطيع الطفل هضمه لأن الإنزيمات المسؤولة عن الهضم تكون غير كاملة النمو قبل بلوغ الطفل العام الأول من عمره، الأمر الذي يسبب له هشاشة في العظام ويؤثر على بنيانه ويجعله عرضة للإصابة بالأمراض نتيجة ضعف مناعته لعدم احتوائه على العناصر الكافية لنموه.

5- إعطاء الطفل طعامًا يحتاج لأسنان، وهو لم تبزغ أسنانه بعد، ما قد يسبب له الاختناق، أو تقديم الأطعمة الصلبة الصغيرة للطفل مثل الذرة الصفراء وحبات العنب والفشار والحلوى والفواكه المجففة قبل بلوغه العام، لأنها قد تقف في حلقه وتسبب له الاختناق.

6- تقديم أي من العصائر الحمضية للطفل مثل عصير البرتقال قبل انتهاء الشهر الثامن، ما يضر معدة الرضيع لأن عصارة المعدة لديه تكون حمضية، وإعطائه عصائر حمضية يزيد من تركيز الأحماض بمعدته، ما يسبب له الضرر وقد يؤدي إلى ألم وطفح جلدي مكان الحفاضة.

7- تحلية طعام الطفل بالعسل قبل إتمامه عامه الأول، وهو من أكثر الأخطاء خطورة لأنه يحتوي على بكتيريا مؤذية للطفل وتشكل خطورة على حياته.

8- إضافة السكر والملح لطعام الطفل، تقع بعض الأمهات في هذا الخطأ الكبير اعتقادًا منها أنه سيساعد طفلها على تقبل الطعام وزيادة شهيته، ولكنه في واقع الأمر يجعل الطفل يعتاد على ذلك ولا يعجبه الطعام بعد ذلك إلا بالمذاق الحادق أو الحلو، ما يعرضه إلى أخطار صحية عديدة ويؤدي غالبًا إلى انخفاض معدل تناوله لوجباته الأساسية.

9- تقديم الزبادي قليل الدسم للطفل خطأً جسيمًا تقع فيه الكثير من الأمهات، حيث يُحظر إعطاء الطفل قبل عمر سنتين حليب قليل أو منزوع الدسم أو أي من مشتقاته، ويمكنه أن يتناول الزبادي كامل الدسم في نهاية الشهر التاسع.

منقووووول

١٠ افكار صباحية لتربية العيال المنسية:

حضرت بالصدفة حوار لمدة دقيقة بين ولد (عمره حوالي ٧ سنين) و ابوه.. الولد بيكلم أبوه في حاجة و الأب بيرد عليه بطريقة توجع القلب! كأنه منافس ليه في السوق أو محتل بلده او شنكله قبل كده و هو بيجري عالاسفلت :/ !! .. نظرات الأب ناحيته نظرات سريعة و تايهه، من غير اهتمام بل و مصحوبة بتكشيم و كلضمه كأنه قرفان يبص ناحية الولد.
طبعاً حكمي الشخصي على الموقف ده غير محايد لأني ماعرفش ظروف الأب في اليوم ده ايه و كده ؛) .. بس في كل الأحوال انا حاقول فكرتي برضه و take it or leave it 😊 .. السبب في البوست ده اني حتى لو مش عارف ظروف الأب فأنا عارف كويس الأثر اللي بيسيبه نوع التعامل ده على الابن!
جدير بالذكر ان انا أب طبيعي عايش في العصر ده و مطحون زي باقي الناس و باقع ساعات في كل انواع الاخطاء! بس بحاول اصلح و باعترف هنا اني عندي اختيار ابقى اب أحسن.

بعد ما كبرنا و فهمنا عرفنا اننا محتاجين نربي اولادنا على حاجات اهم لحياتهم بكتير من اللي بيتعلموه بالصدفة، و محتاجين نعمل ده بطريقة عملية عشان التنظير و النصح المجرد اثبت فشله على مر العصور .. صح؟ طب نعمل ايه؟ ..
دي بعض الافكار اللي ممكن تبدأ تعملها من النهاردة:

١- علمهم الاحترام: أما حد من اولادك يكلمك اتبع الخطوات التالية:
- بص ناحيته
- ركز معاه و اسمعه من غير مقاطعة
- وبعدين رد عليه بتفهم و تقدير لمشاعرة
.. عشان يتعلم الاحترام في الحديث و يعرف من جواه انه كائن محترم فيتعامل على الاساس ده.. على فكرة مهما كان كلامه مش مهم اوي بالنسبالك اعرف انه مهم اوي بالنسباله.. الإنسان اللي حاسس انه مالهوش قيمة إنسان خطر عالناس حواليه! و انت اول واحد حتحاسب عالمشاريب.

٢- علمهم الحب: لما حد من اولادك يقولك تعالى نلعب جرب ترمي اي حاجة في ايدك ٥ دقايق و تقوله ياللا نلعب و تقوم معاه (المشاركة من أهم أدلة الحب عند الأطفال)..جرب كمان تقوله انك بتحبه و تحضنه و تبوسه من غير سبب معين..
مافيش حاجة تستاهل الصيانة و الاهتمام قد قوة علاقتك باولادك! في يوم من الايام الصعبة اللي حينفعك و ينفعهم هي العلاقة دي بس!

٣- علمهم الثقة و اتخاذ القرار: خليهم يختاروا و ياخدوا قرارات في حياتهم اليومية، يتحكموا في مصروفهم و لبسهم و وقتهم و مذاكرتهم و حاجتهم .. اما تعوزهم يعملوا حاجة اديهم اختيارات، و خلي التقييم على النتايج و اديهم حرية على قد ما تقدر في الطريقة اللي بيوصلوا بيها للنتايج..
حتى لو ده حيطلع في الأول نتايج اقل جودة او أبطأ .. استحمل شوية معلش الدنيا ش حتطير .. نمو شخصيتهم على المدى الطويل أهم من نتايج اعمالهم على المدي القصير و من أهم عناصر نمو الشخصية انهم ميخافوش يغلطوا عشان ميخافوش يتعلموا

٤- علمهم البساطة و التواضع و الكرم: اشركهم معاك في التطوع و التبرع و مساعدة الناس و اعمال الخير و علمهم يعملوا ده بتواضع خليهم يروحوا للناس و يتكلموا معاهم .. لما تكون حتدي حد حاجة ما تندهوش، نزل ابنك او بنتك يديها بإيده و علمه يقعد عند مستواه ما يديهاش من فوق!
ملحوظة: (معظمنا بيعلم الاولاد التواضع على انه فضل منه عالناس، فبيطلع التواضع من بره مشحون بالغرور من جوه .. علمهم ان التواضع حق و عدل مش فضل و انهم في الحقيقة مش افضل من حد الا بنعم ربنا عليهم
(الانسان المتكبر جاهل ومسكين)

٥- علمهم الصبر و الايجابية و سعة الحيلة: لما يكون في عندهم مشكلة خليهم هم يحاولوا يحلوها بس في نفس الوقت حسسهم انك معاهم و فاهم احساسهم .. وفر لهم مساحة آمنه و حنينة عشان يحسوا و يحبطوا و يعيطوا و يتعلموا يلاقوا حلول.. اسألهم في الوقت ده عن احلامهم و اهدافهم و نفسهم في ايه و ايه نقط القوة اللي في حياتهم اللي ممكن يستعملوها..

٦- علمهم انهم مسئولين عن حياتهم و تجربتهم: لما ينجحوا في حاجة او يوصلوا لحاجة امدح مجهودهم و اصرارهم و تخطيطهم و طريقتهم في ادارة الامور اكتر ما بتمدح ذكائهم و جمالهم و طعامتهم :-) عشان يعرفوا قيمة المسئولية الكاملة و بذل الجهد بدل ما يعتمدوا على اللي لقوه عندهم من غير مجهود..
العقلية اللي مستعدة دايما تتعلم و تكبر هي العقلية اللي بتنجح و ترتقي بالحياة

٧- علمهم القراءة: عشان اللي ما بيقراش و ما بيتعلمش دماغه بتشتغله و بتمرجحه

٨- علمهم الجدعنه و الشهامة: خليهم يساعدوا الجيران و يعملوا خير في السر من غير ماحد يعرف (ينضفوا حاجة لحد، يشيلوا حاجة من حد، يعدوا حد الطريق .. ) ده اسهل طريق انهم يلاقوا لحياتهم معنى

٩- علمهم ياخدو الامور ببساطة: اعمل جرعة يومية من التهريج و الضحك مهما كانت الظروف و لما حد من ولادك يقع جرب تسيبه يقوم يقف بعد الوقعه لوحده ما تقومش تشيله و اما يجيلك احضن و بوس و طبطب (بس ما تضربش الأرض و الكرسي وما تشتمش الحيطة) .. بلاش هطل و ظلم لمخلوقات ملهاش ذنب :))

١٠- علمهم الإيمان:
- الصلاة في وقتها اهم من كل حاجة
- الحمدلله اول كلمة باقولها لما بتجيلي نعمة
- اول نعمة في يومي اني صحيت الصبح فنبدأ يومنا بالحمد..
- الدعاء و التوكل من أهم اسباب التوفيق لو عايز احقق حاجة..
- حسن معاملة الناس بتسهل الحياة..
الثقة بالنفس و التحكم و القوة الشخصية و قوة العقل و اللياقة .... كلها حيطان مايلة لو من غير إيمان لو سندتك شوية مش حتسندك دايماً.. اللي معندوش إيمان بيبقى فاضي من جواه، ممكن أي حد ممكن يرمي فيه أي حاجة و يقبلها.

اخيراً و اهم من كل ده .. أكلهم من حلال و ماتبطلش تدعيلهم!

خلي البوست ده بقى مكان سهل تشوفه..ابدأ بفكرة واحدة عالاقل النهاردة (و انا كمان حابدأ معاك).. و شير مع الناس المهتمين يتطمنوا على ولادهم.

>> طاقتنا كلها ضايعة في محاولة تظبيط الحياة للعيال.. تعالوا نغير شوية و نجرب نظبط العيال للحياة!

😊 نهاركم سعيد
Ashraf Helal

تمارين مهمة للاطفال الرضع

الفيديو الاول لتمارين الاطفال


الفيديو التانى لتمارين الاطفال

how to do tummy time for 4 months babies

خدمات مكاتب الصحة بمصر

For all the moms and moms to be :

النهارده كنت بطعم بنتى في مركز الصحه اللي في التجمع الخامس و كالعاده بروح اطعمها و امشي علطول لكن سيده مسئوله من العاملين هناك وقفتني و قالتلي " ممكن اقولك حاجات عن كتيب التطعيم اللي معاكى " قلتها اتفضلي و الحقيقه قالتلي الحاجات دي و حبيت انقلها عشان اي ام تستفيد :

١- زي ما تطعيمات الصحه الاساسيه مجانيه كمان بيقدموا خدمات كشف دوري على الطفل من اول ما يتولد مجانا" و قالتي انتو اكيد بتروحوا تدفعوا من ٢٠٠ ل٤٠٠ جنيه في عيادة الدكتور حتى لو رايحين نعمل follow up لكن هما بيعملوا كدا مجانا عشان يتطمنوا على وزن و طول الطفل و التغذيه و غيره

٢ - في صفحه في كتيب التطعيم عباره عن graph ) رسم بياني ) ، ده بيتحط عليه كل مره كشف على الطفل معدل نموه و بعد كدا بيوصلوا الخط ببعض عشان يشوفو نموه طبيعي و لا في اي مشكله زي التقزم مثلا فيحاولوا يعالجوه بدري..

٣- في جدول في الكتيب مكتوب في علامات تطور الطفل في كل شهر ، الحقيقه دا مهم جدا عشان الواحد يراقب ابنه او بنته و حركات نموهم ( انا شخصيا جبت كتاب من برا مخصوص عشان كان في الجدول دا )

٤- الكشف بعد سنه ، عشان يشوفو تغذية الطفل و الهيموجلوبين و يكتبوا على الفيتامينات اللي محتاجها

٥- في وحدة كشف النساء و دي بتكون لاى سيده سواء كانت حامل / في مرحلة الرضاعه و ما بعد الولاده / غير حامل ، الكشف فيها بأسعار رمزيه و قالت كمان ان السيدات محتاجين يعرفوا ان في وسائل منع حمل بتتركب ب٢ جنيه ! بدل ال ٤٠٠ جنيه في العيادات الخاصه و قالتلي انو بيكون نفس الانواع و ان الدكاتره بياخدوا من عندهم

انا قلتلها ان الناس متعرفش كل الخدمات دي و انهم لازم يعملوا awareness campaign فقالتلي انهم بيكتبوا على الفيس بوك و يا ريت انقل الكلام دا انا كمان للناس .

#خدمات_مكاتب_الصحه
#تطعيم_الصحه
#الأم_و_الطفل

منقووووول

طفرات النمو اول ٣ سنين من عمر الطفل

أول 3 سنين في حياة الطفل بيجيله أوقات بيصوت كتير مش متضايق مثلا لأ قصدي زهقان ,متحمس ,منبهر,في المول رايح جي يصوت مع نفسه 😂😂
عارفين ليه ؟
يا قلبي في السن ده أفكارهم و مشاعرهم بتزيد و بتبقي أكبر من عدد الكلمات و الحروف اللي بيعرف الطفل يعبر بيها فقصاد كلماته أو حروفه المعدودة و تزاحم أفكاره المفاجئ بيصوت سبحان الله ده معناه إنه بينمو .الطفل أول 3 سنوات بيكتمل نمو 85% من قدرات العقل اللي هيتبني عليها بعد كده  تخيليوا في وقت صغير زي ده تنمو نسبة كبيرة زي دي بيحصل طفرات نمو رهيبة مخهم مش بيبقي ملاحق علي المعلومات اللي بيستقبلها .

إنسي الطفل و تخيلي كده لو إنت بزحمة أفكارك و مشاعرك دي  معندكيش لغة للتعبير ولا بالكلام ولا حتي بالإشارة و لسه مبتقدريش تلبي إحتياجاتك لنفسك حتي كباية الماية مبتعرفيش تجيبيها لما الأفكار تكتر و تمري بمواقف مختلفة ممكن تعملي إيه غير الصويت ؟ فهو مش بس علامة نمو هو رحمة كبيرة من ربنا للطفل عامل بالظبط زي ما يكون في ضغط في الكهرباء فنفصلها بدل ما نسيبها تعمل قافلة و تبوظ الأجهزة ,الطفل كمان ربنا بيديه الخاصية دي علشان يحصله release فأفكاره تنمو لكن جهازة العصبي ميتعبش .

تخييلي بقي في هذه المرحلة المهمة يلاقي حد كبير بيزعقله ولا يبرقله علشان يسكت ولا بيقوله لأ كده غلط و نفضل نصرخ فيه و نقوله بس بسسسسسسسسسس بقييي ,ممكن يستقبل ده إزاي ؟ما طبعا مش هيسكت بالعكس هيعمل اللي بنقول عليه عند دفاعا عن نموه و في ناس كتير للأسف متعرفش فممكن يزعقوا للطفل و يضربوه و يتعاملوا علي اساس إن هو اللي مزعج و عنيد و هو أصلا معملهمش حاجة 😥

طيب نعمل إيه لما يصوت ؟
1- لو الموقف مفهوم بالنسبالك مثلا صوت أول ما دخلتوا عند جدته حاولي تشرحي الفكرة و المشاعر اللي قد يكون الطفل حاسسهم زي :إيه ده إنت فرحان علشان شوفت تيته الله ده هي مبسوطة أووووووي .....
2- لو مش عارفه بيصوت ليه يبقي هنخف التزاحم ده بتشتيته في فكرة تانية محددة شتتيه بلعبه,حضن,زغزغه ,.....
3- لو في مكان معيين إنت عارفه إنه بيعمل كده فيه زي المول مثلا دايما  فكري في حلول مسبقة مثلا لو حد غيرك ممكن يروح المشوار ده ماشي , أول ما تدخلوا إنت تتواصلي معاه و تخليه يلمس الحاجات اللي متاح يستكشفها , تاخديله لعبة معينة مش بتطلع غير هناك علشان ميبقاش متعود عليها ممكن , تخليه يمسك معاكي حاجات و يشيل و يحط ممكن ,تلعبوا لعبة ليها علاقة بالمكان زي إنكوا تدوروا علي اللمبات المنورة في المكان و تشاوروا عليها ...يعني إنت خلاص عرفتي السبب و الحل فمن الأخر إشغليه بفكرة محددة هتخفي الزحمة .
4- إتأكدي إن إحتياجاته الأساسية من أكل و نوم متظبطة .
5- طبعا سيبيه علي قد ما تقدري يصوت عادي في البيت و بره كمان لو ينفع .
6- حسي بيه و حطي نفسك مكانه و الله يستاهلوا التعاطف خسسيه إنك بتساعديه و فاهمة اللي فيه مش إنك مستاءه منه دي لوحدها كفيلة تريحهم <3
7- تقبلي إنك بشر بتحسي ساعات إنك مش طايقة صوته و مشاعرك حقك بس حاولي تظبطي ردود أفعالك و اي وقت تعرفي تفصلي عنه ممكن ,تحطي سدادات في ودنك ميضرش مشي حالك يعني :D

* كلنا عارفين إن السن ده صعب جدا بس مهم تكوني فاهمة إنك لو إستنيتي من طفل يعمل حاجة عكس مرحلة نموه أو حاولتي تقنعيه بحاجة و هو لسه أصغر من إنه يستوعبها ده حرفيا بالنسباله و بالنسبالك عذاب علشان كده بنحاول دايما نحل من جانبنا كأهل حلول علشان نتكييف مع طبيعة المرحلة و نسيبها زي ما هي مش علشان نغيير سمات مرحلة ربنا خلقهم فيها كده لحكمة <3
منقووووول
#سيبوني_أرقع_بالصوت 😂😂
#أول_3_سنين
#منة_صلاح متخصصة تعديل سلوك أطفال و مراهقين
علشان يوصلك كل المقالات دوس follow و إختار see first